Tumetesing Kabar

Sedulur, iki woro-woro maneh. Dene aku nembe wae posting kabar lan foto ing www.tumetesingkabar.wordpress.com. Judule Becak Ajaib; ngakut kotak kayu kanggo kemasan buah, ngati ora ketok sing mancal. Para sedulur sing pengin mangertine kaya apa ajaibe becak iku bisa klik situs ing dhuwur. Nuwun 

Mulai 17 Desember 2008, blog-ku iki pindahan omah neng situs siji iki, www.tumetesingkabar.wordpress.com. Mulane kanca-kanca sing ngersakake maca blog Jawa tak sumanggakake tindak neng ‘omahku’ sing anyar.

Ana tulisan gres sing isa diwoco kanggo tambahan pengetahuan ing jagad Surabaya. Tulisan paling keri sing dak posting judule Bonggol ‘Burung’ Luwih Enak.

Sambanjure, yen ana tulisan anyar bakal tak release neng blog lawas iki. Muga-muga kanca-kanca ora bingung, goleki ’omahku’ sing anyar. Nuwun 

Buah naga merah ing omahe wong tuwaku, Dukuh Jelok, Kelurahan Bulukerto, Magetan, wis mulai ngembang. Nyenengake, kembange gedhe-gedhe kaya kembang wijaya kusumo sing mengkroke mung bengi.

Tanduran kang kalebu jenis kantus iki wis uwoh ping pindho. Pertama taun wingi. Jarene ibuku lan dulur-dulurku uwohe legi. Beda karo buah naga sing putih. Nanging aku ora iso ngrasakake amarga isih nglakoni jejibahan ing Surabaya. “Rasane enak banget, legi,” mangkana kandhane ibuku. 

Masiyo ora melu ngrasakake nanging aku yo rumangsa seneng. Amarga bibit buah naga merah iku sing ‘golek’ aku. Sing nandur almarhum bapakku. Bibite tuku neng Gedangan, Sidoarjo. Rikala semana, taun 2004, regane bibit buah naga isih melip. Sak batang ukuran 30 sentimeter sing wis dideder pangaji Rp 15.000 nganti Rp 25.000.

Nanging saiki wis ora tuku bibit maneh. Malahan tangga teparo padha bibit neng omahku. Sapa wae pengin nandur, mung bacok pange sing tuwa, banjur diencekake. Emane aku durung bisa babarake buah naga jenis iki, sanadyan lahane ya wis cumepak. nuwun 

Petani ing perkotaan ora gelem kalah karo petani ing desa. Musim udan, petani perkotaan padha mulai deder winih. Kaya kapacak ing foto ndhuwur kuwi. Mbokde asal Babatan Wiyung iki, katon sengkut olehe dangir tegalan ing kawasan kampus Unesa, Lidah Wetan. Tegalan iku ditanduri lombok belis (lombok cilik). Kira-kira sakwulan setengah maneh lombok-lombok kuwi wis padha uwoh. Mendah senenge si mbokde yen wayahe panen. Apa maneh pas regane larang tur lomboke pedes-pedes, ora dipangan ama. Nuwun 

Musim pelem ing kampungku, Jelok, Bulukerto, Magetan, ana sing istimewa. Taun iki uwohe akeh banget utawa dompyokan. Termasuk pelem manalagi.

Nanging manalagi siji iki, beda karo manalagi sing biasane, sing gedene mung sakepel. Manalagi saka Jelok iki luwih gede. Siji bobote iso sekilo (kaya kapacak ing foto, sing tengah. Kiwa pelem gadung lan tengen manalagi biasane).

Rasane luwih enak lan luwih legi. Dagingi iyo luwi alus tinimbang manalagi liyane. Kulite tipis tur ambune arum. Wong Jawa Etan biasane ngarani pelem iki manalagi lambawi. Yen mateng kulite tetep ijo.

Nanging kelemahane pelem iki, bentuke ora padha. Sak wit ana sing uwohw bentuke lurus tur gede-gede. Nangin ya ana sing mlungker mung sakepel. 

Ing keluargaku pelem iki termasuk istimewa. Lagi uwoh, sing mesen wis akeh banget. Malah yen sedulurku teka mesti sing dijujuk pelem iki. Sanadyan pelem liyane ya padha nguwoh, kayata gadung, bapang (kulite rada abang), kweni utawa peni, isih ana jenis liyane sing aneh, kaya santok lan sapanunggalane.

Aku dewe ya melu pesen yen wis uwoh. Sanadyan pas ngunduh akhire ya mung keduman telu amarga didum, termasuk sedulurku ing Purbalingga, Jawa Tengah ya keduman. Nanging lumayan isa kanggo tombo pingin lan kangen marang kampungku. nuwun

Iwak kok rupane biru ? Mangkana pitakonane salah siji pengunjung Tempat Pelelangan Ikan (TPI) Kalang Anyar, Kecamatan Sedati, Sidoarjo, katon gumun.

“Jenenge iwak bethet. Niki rasane eco. Cocoke dibakar,” saute bakule karo nudingi iwak mau, Minggu (27/10).

Iwak bethet wujude kaya kakap lan gurami. Nanging sing bedakake warnane, biru. Iwak iki asil tangkepane nelayan ing pesisir Sidoarjo.

Saliyane iwak bethet, ana jenis liyane sing dadi daya tarike TPI. Yaiku iwak hiu polos, sing gedhene mung sak lengen. Jarene, ora mung siripe sing diarah, nanging daginge ya enak. Upamane dibakar utawa disate.

Regane iwak hiu jenis iki lumayan larang. Perkilograme ditawakake Rp 20.000. “Niki daginge katah mas, tur rasane nggih enak, ” kandhane bakule.

Wah, pancen nyenengake yen mlaku-mlaku neng TPI. Utamane pas dina minggu. Sing blanja akeh banget. Aret tuku petis ana, tuku kerang kulitan lan oncekkan ya wis cemepak. “Mriki yen minggu pancen rame,” kandhane Sutikno, bakul iwak patin. 

Tuku tuna, kerapu, dorang, bandeng, patin lan udang ya kari milih. Mung nari sangune wae. Sing seneng kepiting, rajungan lan cumi-cumi ora perlu kawatir. 

Malahan yen pengin didhahar neng kana, karo menikmati suasana kampung nelayan, ya isa. Persis ngarepe TPI ana warung sing siap ngolahake kewan-kewan laut mau. nuwun

NB:foto liyane kapacak ing Pages, Galeri Iwak Hiu

Mendung ireng angendanu. Iku istilah sing paling trep lan pas kanggo nyebut kahanan dina Selasa sore, 21Oktober 2008. Nalika iku, jam 16.00 WIK (Wektu Indonesia Kulon) mendung ireng nutupi Kutha Pahlawan Surabaya dikanthi gerimis riwis-riwis lan angin rada banter. 

Yen jarene prakirawan Badan Meterologi dan Geofisika alias BMG, wujud mendung kaya ngana iku, ireng tur kandel, bisa nyebabake angin puting beliung. Ing basa ilmiahe awan mau kasebut cumulusnimbus utawa awan CB.

Iku tandane mangsa ketiga ganti mangsa rendheng utawa labuh. Artine hawa panas sing dirasakake warga wis sumingkir. Rong dina  (19/10/2008) kepungkur, hawa ing Surabaya tembus 37 derajat celcius. Saiki sethitik-sethitik wis mudhun.  

Biasane awaling mangsa rendheng, udan kapindo (2), muncul laron. Kewan gedhene mung sakbiting, getihe putih, nyempluk warnane soklat, duwe lar (sayap) papat. 

Ing karang padesan, laron diolah dadi panganan. Kayata bothok lan rempenyek. Rasane gurih lan kandungan proteine tinggi tur ora ngandut zat mbebayani. Kayata melamin, lan sapanunggalane.  

Ing Surabaya wis angel ditemokake olahan saka laron. Sanadyan kewan iki ya ana. Sing mesthi gampang ditemokake ing kutho iki ya mung banjir lan ambune sampah yen mangsa labuh teka.

Mulane yen wayahe udan teka, tetep akeh wong Surabaya sing sambat, amarga kebanjiran. Mangsa ketiga sambat panas.  Pancen manungsa.

Seje karo wong ndesa, yen wis labuh kaya ngene atine malah seneng. Amarga tegalan bisa ditanduri jagung, kacang lan pala pendhem liyane mulai njebul. Sing duwe sawah ya bisa nandur pari. Nuwun

Telung dina kepungkur, tepate Sabtu (18/10/2008), pas aku melu rapat kerja ing Mabes Margorejo Indah, tanpa kanyana-nyana dilungi kertas gambar dening kancaku. Kertas iku isine gambar coret tangan nganggo pulpen.  

Wah, rasane bungah. Amarga gambar karyane sedulur Dodo HW iku sketsane wajahku. Mirip banget. Bisa kanggo kenang-kenangan anak putu. Termasuk kenang-kenangan karo si pelukise. ”Iki lho gambarku nalika enom (tapi kok wajahe tuwek) sing dilukis Pak Dodo,” mangkana grenenge atiku.   

Nanging wektu iku gambare kurang lengkap. Arsirane rambut lan wajah durung genep. Mula, sketsa mau dak lungake maneh marang dheweke supaya dilengkapi. Asile saya lumayan maneh, kaya kapacak ing duwur.

Mulane lewat tulisan iki, aku ngucap syukur lan matur nuwun marang sedulur Dodo HW. Muga-muga karya lukisane bisa dikenal dening masyarakat pencinta seni. Nuwun    

Iwak lele sing kapacak ing foto sebelah gedhene ora lumrah. Bobote kira-kira pitung kilo gram. Dawane limang kilan, utawa meh sakmeter. Dene umure antarane rong taun luwih.

Lele jenis dumbo iku ingon-ingone sedulurku sing manggon ana dukuh Jelok, Kelurahan Bulukerto, Magetan.  Ora mung siji, nanging ana puluhan lele kang gedhene pada.

Pancen awale lele iku diingu kusus kanggo ngelayani pemancingan. Nanging ora kabeh didol. Sebagian tetep diingu supaya gede. Sing didol kango pemancingan rata-rata bobot pitung ons nganti sakilo.

Nate, lele iki digawa sajodo neng Purbalingga. Neng kolam anyar ing tlatah Jawa Tengah kuwi nuli dipijahake. Asile luar biasa, anake lele sing netes jumlahe ratusan ribu. “Ora mung sewu rong ewu. Anake nganti rongatus ewu,” kandane Mas Budi sing melu ‘ngevakuasi’ indukan lele iku, Sabtu (4/10/2008).

Masiya wis gedhe, iwak iki ingon-ingonane gampang tur ora setresan. Panganan apa wae, kususes sing amis-amis ora tau nolak. Biasane sisa dapur isa langsung diwenehake, kayata remukan iwak laut, limbah daging utawa balung sing dialusake. Luwih sehat maneh yen ditambah pelet (pakan instan) lan godong-godongan.

Liburan Lebaran dek emben, pas mulih Magetan, aku (penulis) lan kakangku saka Purbalingga entuk kalodangan ‘wisata’ nyekel iwak lele ‘raksasa’ iku. Nanging jebule angel banget. Serok (jaring) ora kuwat kanggo ngangkat, malah padha jebol kabeh.  Nuwun

 NB: foto liyane kapacak ing Pages, Galeri Foto Lele.